Presentación

Temos unha estratexia

A Estratexia de Seguridade e Saúde no Traballo de Galicia: Horizonte 2027 establece como unha das súas prioridades a de enfrontar os riscos psicosociais que afectan as persoas traballadoras, como o estrés, a violencia ou o desgaste profesional, entre outros, e a de procurar reducir, con carácter xeral, os danos na saúde das persoas, tanto en accidentes laborais como en enfermidades profesionais. Este marco estratéxico pon énfase tanto nos riscos psicosociais tradicionais como nos novos riscos que emerxen neste ámbito, relacionados coa saúde mental. Non só se contempla a perspectiva da persoa traballadora, senón que tamén require a participación das empresas e a promoción e asesoramento por parte da Administración.

Ademais, incide na colaboración coa Universidade e os centros de investigación para promover a investigación e a mellora do coñecemento en materia de prevención de riscos laborais.

O ISSGA e a USC crean o Laboratorio de Riscos Psicosociais

O conselleiro de Emprego, Comercio e Emigración e o reitor da USC asinaron o 19 de xuño do 2024 un protocolo de actuación para a posta en marcha do Laboratorio de Riscos Psicosociais.

O Laboratorio, liderado polo Issga, está composto por persoal do Issga e da USC especialista na materia e está especializado na investigación, desenvolvemento e innovación para mellorar a saúde psicosocial das persoas traballadoras en Galicia. O obxectivo principal é aumentar o coñecemento e a comprensión dos riscos psicosociais, así como articular medidas para previlos.

Entre as súas funcións está a de elaborar material técnico para acompañar ao tecido empresarial de Galicia en novas iniciativas que incidan na mellora das condicións de traballo e que axude ás empresas a afrontar de xeito adecuado novos modelos con riscos diferentes. Nel desenvolveranse, entre outras accións, proxectos de I+D+i, traballos e teses de doutoramento, iniciativas de sensibilización e campañas de saúde mental nas empresas. Todo isto ademais das campañas que desenvolve o Issga neste eido.

Este portal é unha ferramenta para a divulgación das publicacións do Laboratorio así coma un lugar onde poder atopar outras publicacións de interese relacionadas co ámbito psicosocial.

Curso de verán_USC_ISSGA →Curso de verán_USC_ISSGA

Xornada técnica "Transformación dixital e intelixencia artificial: unha mirada desde a saúde laboral"

Esta xornada técnica está organizada no marco das actuacións do Laboratorio de Riscos Psicosociais Issga-USC para 2026 no convencemento de que a transformación dixital e a incorporación da intelixencia artificial están a modificar profundamente a organización do traballo, xerando novos desafíos para a xestión das persoas, a prevención dos riscos psicosociais e a retención do talento.

A xornada celebrarase o 11 de xuño de 2026, en horario de 10:00 a 14:30 horas, en modalidade presencial, na Casa do Concello de Ribadeo e nela abordaranse cuestións clave relacionadas co impacto da dixitalización e da IA na saúde laboral, ofrecendo unha visión práctica, actualizada e baseada na evidencia sobre:

  • os novos riscos psicosociais asociados aos cambios tecnolóxicos

  • estratexias de prevención e adaptación organizativa

  • ferramentas para favorecer contornos laborais saudables e sostibles

  • claves para afrontar estes cambios con garantías legais e sociais

A actividade está especialmente dirixida a persoal directivo, responsables de recursos humanos, prevención de riscos laborais e outras áreas con interese nesta temática.

PROGRAMA

09.45 REXISTRO E BENVIDA

10.00 CONFERENCIA: “A transformación do mundo do traballo”

Antonio León García Izquierdo. Catedrático de Psicoloxía do Traballo, das Organizacións e dos Recursos Humanos da Universidade de Oviedo

11.00 INAUGURACIÓN

Representante da Universidade de Santiago de Compostela
Pablo Fernández López. Secretario Xeral de Emprego e Relacións Laborais da Consellería de Emprego, Comercio e Emigración
Daniel Vega Pérez. Alcalde do Concello de Ribadeo

11.30 CONFERENCIA: “Entre algoritmos e persoas” 

Sonia María Valladares Rodríguez. Profesora de Ciencia da Computación e Intelixencia Artificial da Universidade de Santiago de Compostela

12.15 PAUSA ACTIVA E CAFÉ

12.30 OBRADOIRO: “Detectar e medir os riscos psicosociais na era dixital”

César André Rivas. Xefe da Sección de Ergonomía e Psicosocioloxía Aplicada do Instituto de Seguridade e Saúde Laboral de Galicia

13.00 CONFERENCIA: “O coidado das persoas en contornas dixitais: prevención e benestar laboral”

Nieves Lorenzo Espeso. Xefa da Área Técnica de Medicina do Traballo, Ergonomía e Psicosocioloxía Aplicada no Instituto de Seguridade e Saúde Laboral de Galicia 

13.30 OBRADOIRO: “Deseño de traballos seguros e saudables na era dixital”

Carlos Montes Piñeiro. Profesor de Psicoloxía do Traballo e das Organizacións da Universidade de Santiago de Compostela

14.15 PECHE 

Carlos Montes Piñeiro. Profesor de Psicoloxía do Traballo e das Organizacións da Universidade de Santiago de Compostela
Adela Quinzá-Torroja García. Xerente do Instituto de Seguridade e Saúde Laboral de Galicia

 

Máis información e inscrición: web Issga_Formación

XT_Laboratorio Riscos Psicosociais_2026

XT_Laboratorio Riscos Psicosociais_2026

Portais temáticos

Nanomateriais

Laboratorio de riscos psicosociais

Pesca

Agro e forestal

Construción

Industria e servizos

Amianto

Promoción da saúde

Emprego autónomo

Integración da igualdade

Escola de prevención

Curso de verán “Riscos psicosociais no traballo: avances científicos e enfoques aplicados”

Este evento está organizado polo Laboratorio de Riscos Psicosociais do Instituto de Seguridade e Saúde Laboral de Galicia e pola Universidade de Santiago de Compostela, e forma parte da programación da Universidade de Verán 2025 da USC.

Este curso ofrece unha oportunidade para coñecer os últimos avances científicos no ámbito da psicosocioloxía aplicada e explorar solucións prácticas para a súa prevención e xestión en diferentes contornas laborais. Abordará a comprensión dos riscos psicosociais, as ferramentas para a súa avaliación, as estratexias de intervención e o papel das políticas públicas na súa mitigación, contribuíndo á creación de ambientes laborais máis saudables e sostibles..

Ubicación: Ribadeo

Duración total: 15

Matrícula na actividade: 15/05/2025 - 30/05/2025

Desenvolvemento da actividade: 11/06/2025 - 13/06/2025

Número total de prazas: 50

Prezo único (prez total da actividade): 70€

Matrícula: Límite de prazas con lista de agarda

Taxa reducida: Tasa reducida, aplicable a estudantes universitarios, de bacharelato ou de formación profesional, pensionistas, desempregado/as, socios/as da Asociación de Antigos alumnos da USC, e PDI e PAS da USC: 40 €

 

PROGRAMA/CONTIDOS 

 

Dirección: Carlos Montes Piñeiro e Adela Quinzá-Torroja-García

Secretaría: Carlos Dopico Casal e Alberto Conde Bóveda

Lugar de celebración: Salón dos Alcaldes - Pazo de Ibáñez, Ribadeo (Lugo)

Máis información → Programa curso de verán 2025