ISSGA

Presentación das políticas en materia de prevención de riscos laborais e promoción da saúde no traballo

A Estratexia de Seguridade e Saúde no Traballo de Galicia: Horizonte 2027 constitúe o instrumento a medio prazo para desenvolver de forma ordenada e eficaz as políticas do Goberno galego nesta materia. Esta planificación adóptase co máximo consenso cos interlocutores sociais polo convencemento de que unha materia de tanta sensibilidade debe ser abordada no marco do diálogo social.

Para todos os implicados no mundo das relacións laborais existe unha meta común que é a redución da sinistralidade laboral a través da mellora da xestión preventiva dos riscos nos lugares de traballo, así como dar a adecuada resposta aos novos desafíos nun momento de especial dinamismo e transición que afectan ao noso traballo.

Esta estratexia céntrase nas persoas e incide a través da consecución progresiva do benestar laboral nun aumento da produtividade económica e social do noso tecido empresarial, abordando tanto os riscos tradicionais como os emerxentes. Caracterízase pola súa natureza integral, atende a todas as disciplinas preventivas, é transversal, destínase á totalidade do traballo en Galicia e está participada activamente polos axentes sociais; contempla unha mirada posta na nova realidade económica e asume como principio informador a perspectiva de xénero cara a unha igualdade laboral e unha sociedade máis equitativa.

Órganos de goberno

PRESIDENCIA

A Presidencia do Instituto é o órgano unipersoal de goberno. Exercerá a presidencia do Instituto a persoa titular da consellería competente en materia de traballo, na actualidade a Conselleira de Emprego e Igualdade.

Non obstante, en virtude do disposto no artigo 64.2 da Lei 16/2010, do 17 de decembro, o Consello da Xunta poderá nomear outra persoa para desempeñar o cargo, por proposta da persoa titular da consellería competente en materia de traballo.

Corresponde á persoa titular da Presidencia:

• Desempeñar a representación do Consello Reitor e a representación do Instituto, incluíndo as actuacións fronte a terceiros relativas aos seus bens e dereitos patrimoniais, así como a subscrición dos convenios e acordos de colaboración.
• Efectuar a designación e a destitución da persoa titular da Xerencia do Instituto.
• Presidir e convocar o consello Reitor, co desempeño de todas as demais competencias que lle correspondan como presidente do órgano colexiado.
• Autorizar os gastos necesarios e ordenar os pagamentos correspondentes do Instituto.
• Actuar como órgano de contratación e exercer a dirección superior do persoal do Instituto.
• Velar polo cumprimento das leis e pola execución dos acordos adoptados polo Consello Reitor.
• Dar conta, se é o caso, a outras consellerías dos acordos adoptados polo Consello Reitor.
• Impulsar e supervisar as actuacións do organismo.

CONSELLO REITOR

O Consello Reitor é o órgano superior colexiado de goberno do instituto. Os seus membros serán nomeados pola persoa titular da consellería de adscrición. No Consello Reitor será paritaria a representación dos axentes sociais e da Administración.O Consello Reitor estará formado:

1. Pola Presidencia.
2. Por unha Vicepresidencia.
3. Os/as seguintes vogais:
   • En representación dos axentes sociais: un/unha vogal en representación de cada un dos sindicatos que estean presentes na Mesa Xeral de Negociación das Administracións Públicas, nos termos expostos na disposición adicional decimoterceira da Lei 16/2010, do 17 de decembro, e o mesmo número de vogais designados por proposta das organizacións empresariais máis representativas da Comunidade Autónoma
   • En representación da Administración, un número de vogais suficiente para garantir a composición paritaria do Consello Reitor:
     • A persoa titular da Xerencia do Instituto.
     • Un/unha vogal por cada unha das consellerías con competencias en materia de sanidade, minas e facenda, designado pola persoa titular da consellería respectiva de entre as persoas titulares dos seus órganos superiores ou de dirección.
     • No caso de ser necesario, os/as restantes vogais serán designados/as pola persoa titular da consellería competente en materia de traballo entre as persoas titulares dos seus órganos superiores ou de dirección da Administración xeral da Comunidade Autónoma.
4. A Secretaría do Consello Reitor.

Órgano executivo

XERENCIA

A Xerencia é o órgano executivo do Instituto, responsable da xestión ordinaria deste.
A persoa que exerza a titularidade da Xerencia é persoal funcionario con rango orgánico de subdirección xeral e será nomeada e cesada pola Presidencia do Instituto, logo da consulta ás organizacións representadas no Consello Reitor.
Nos supostos de vacante, ausencia, enfermidade ou outra causa legal, a persoa titular da Xerencia será suplida na totalidade das súas atribucións polas persoas responsables das subdireccións establecidas nos artigos 24 e 25, e na orde de precedencia en que estas veñen referenciadas. Correspóndelle á Xerencia do Instituto o desempeño da xestión ordinaria do Instituto, e exerce as seguintes funcións:

• Asistir a Presidencia do Consello Reitor no exercicio das súas funcións.
• Levar a cabo o asesoramento e os informes que lle solicite a Presidencia do Instituto.
• Elaborar o proxecto do plan anual de actividades, que incluirá as actuacións técnicas e a súa planificación temporal, e elevalo ao Consello Reitor.
• Elaborar a proposta de relación de postos de traballo do Instituto.
• Exercer a xefatura e dirección do persoal adscrito ao organismo.
• Elaborar as contas e o anteproxecto de orzamento para a súa presentación ao Consello Reitor.
• Impulsar, orientar, coordinar e inspeccionar as unidades adscritas ao Instituto e ditar as disposicións, instrucións e circulares relativas ao seu funcionamento.
• Elaborar o informe anual coa relación de todas as actividades do Instituto para a súa aprobación polo Consello Reitor e remitilo ao Parlamento para o exercicio do control parlamentario.
• Proporcionar e recibir das consellerías con competencias concorrentes en materia de seguridade e saúde laboral canta información sexa precisa para o desenvolvemento das funcións en materia de seguridade e saúde laboral.
• Establecer a coordinación necesaria para garantir a cooperación institucional con todas as administracións na materia de prevención de riscos laborais.
• Desenvolver as actuacións de colaboración técnica coa Inspección de Traballo e Seguridade Social.
• Colaborar coa Administración laboral, sanitaria, mineira, industrial e outras que o soliciten por razón da materia.
• Facilitarlle ao Consello Galego de Seguridade e Saúde Laboral canta información sexa precisa para o desenvolvemento das súas funcións e asistir ás súas reunións.
• Exercer as facultades non atribuídas especificamente a outros órganos do Instituto.
• Calquera outra que poida serlle asignada pola normativa aplicable ou que lle delegue ou encomende a persoa titular da Presidencia do Instituto ou o Consello Reitor.

Estrutura administrativa

SUBDIRECCIÓN XERAL DE ADMINISTRACIÓN E PERSOAL

Corresponde á Subdirección Xeral de Administración e Persoal:

• Executar o orzamento do Instituto.
• Efectuar a tramitación económico-administrativa dos expedientes de gasto e as propostas.
• de pagamento e a xestión dos expedientes de contratación.
• Efectuar a habilitación de pagamentos e adquisición, xestión e control de medios materiais para o funcionamento ordinario do Instituto.
• Elaborar os informes de carácter económico ou administrativo que lle solicite a Xerencia.
• Xestionar os asuntos de réxime interior, rexistro, documentación administrativa, arquivo e inventario.
• Analizar, avaliar e elaborar as propostas de desenvolvemento normativo que correspondan ao Instituto.
• A coordinación da tramitación administrativa para a publicación dos acordos e convenios de colaboración que subscriba o Instituto.
• Coordinar coa Axencia para a Modernización Tecnolóxica a xestión da rede e das aplicacións informáticas do Instituto.
• Realizar a xestión de persoal e nóminas e a coordinación do sistema de xestión de procedementos administrativos e outras cuestións de contido administrativo que lle atribúa a Xerencia.
• Levar a cabo a xestión de asuntos xerais tales como mantemento das instalacións ou vehículos adscritos.
• Practicar o seguimento e supervisión das actuacións económicas, administrativas e de persoal dos centros territoriais.
• Coordinar a publicación no Diario Oficial de Galicia e demais diarios ou boletíns oficiais das disposicións ou actos ditados polo Instituto.
• Prestar apoio para a elaboración tanto do plan anual de actividades como do informe anual das actividades realizadas no que se refire aos datos de xestión interna e dos asuntos propios da Subdirección.
• Exercer cantas funcións lle encomende a Xerencia.

SUBDIRECCIÓN XERAL TÉCNICA E DE PLANIFICACIÓN

Corresponde á Subdirección Xeral Técnica e de Planificación:

• Elaborar o borrador do plan anual de actividades técnicas de acordo coas instrucións da Xerencia.
• A elaboración da proposta do informe anual das actividades.
• Planificar, coordinar e supervisar, con carácter xeral, as actuacións técnico-preventivas, incluídas as que executen nos centros territoriais, de acordo coas políticas establecidas e as actividades planificadas.
• Desenvolver as actuacións de colaboración técnica coa autoridade laboral e de apoio técnico e colaboración coa Inspección de Traballo e Seguridade Social.
• Executar as actuacións de colaboración técnica con outras unidades con competencia en materia de seguridade e saúde laboral, especialmente coa autoridade laboral, sanitaria e mineira.
• Realizar o seguimento das actuacións de colaboración técnica con outros organismos públicos.
• Coordinar a participación técnica en grupos de traballo no ámbito estatal e autonómico.
• Levar a cabo a elaboración, control e seguimento dos acordos e convenios de colaboración.
• Impulsar a execución e coordinar as accións planificadas dos técnicos habilitados consonte o establecido no Real decreto 689/2005, do 10 de xuño, polo que se modifica o reglamento de organización e funcionamiento da Inspección de Traballo, e o Decreto 138/2007, do 5 de xullo, polo que se regula a habilitación do persoal técnico para o exercicio de actuacións comprobatorias das condicións de seguridade e saúde nas empresas e centros de traballo. 
• Elaborar os informes de carácter técnico que lle solicite a Xerencia. 
• Exercer cantas funcións lle encomende la Xerencia 

SERVIZO TÉCNICO E DE PLANIFICACIÓN

Para o desenvolvemento das súas funcións, a Subdirección Xeral Técnica e de Planificación contará coa unidade administrativa Servizo Técnico e de Planificación, ao cal lle corresponde:

• Asesorar e emitir informes sobre aquelas cuestións que lle encomende a subdirección.
• Executar as actividades e accións planificadas de acordo coas instrucións da Subdirección Xeral Técnica e de Planificación.
• Realizar a coordinación operativa e control das actuacións técnicas, incluídas as dos centros territoriais, de acordo coas políticas establecidas e as actividades planificadas.
• Coñecer, tratar, elaborar e difundir os informes e os datos estatísticos sobre sinistralidade laboral e as condicións de traballo.
• Coordinar a elaboración dos informes técnicos solicitados aos centros para a acreditación ou a autorización dos servizos de prevención alleos, entidades formativas e persoas ou entidades especializadas, así como a daqueloutros informes que sexan requiridos por institucións públicas.
• Xestionar a acción informativa e formativa, así como os contidos da páxina web.
• Exercer cantas funcións lle encomende a Subdirección Xeral Técnica e de Planificación.

CENTROS TERRITORIAIS DO ISSGA

Configúranse como órganos de ámbito territorial provincial do Instituto en cada unha das provincias aos cales lles corresponde o desenvolvemento das funcións propias deste no seu ámbito territorial.
Corresponden á xefatura do centro, dentro do seu ámbito territorial, as seguintes funcións:

• Impulsar, coordinar e supervisar o funcionamento de todas as unidades do centro para dar cumprimento ao plan anual de actividades.
• Realizar a coordinación das distintas actividades e o control da súa execución e cantas outras accións sexan necesarias para o mellor cumprimento do plan anual de actividades, que incluirá a presentación periódica á Xerencia do Instituto dos resultados acadados, tanto cualitativos como cuantitativos.
• Manter, dentro da planificación establecida, a colaboración do centro con calquera outro órgano ou institución de ámbito provincial para garantir a coordinación das accións en materia de prevención de riscos laborais.
• Presentar á Xerencia do Instituto propostas de actuacións técnicas e de carácter administrativo.
• Xestionar e tramitar electronicamente a notificación dos partes de accidentes de traballo, así como cursar a notificación das enfermidades profesionais e daquelas que, sen seren profesionais, teñen a súa orixe no traballo.
• Efectuar a organización e o control da xestión económica e do persoal adscrito ao centro, seguindo as instrucións e baixo a coordinación da Subdirección Xeral de Administración e Persoal.
• Dar cumprimento á investigación rápida e eficaz dos accidentes de traballo en coordinación coa autoridade laboral provincial, a Inspección Provincial de Traballo e Seguridade Social, servizos de emerxencia e fiscalía, dando conta de cada actuación á Dirección do Instituto.
• Garantir a colaboración, se é o caso, do persoal técnico do Instituto de Seguridade e Saúde Laboral  de Galicia cos tribunais de xustiza.
• Cantas outras relacionadas con competencias do Instituto no ámbito territorial do centro ou que se lle encomende a Xerencia do Instituto.

Outros órganos do Instituto

LABORATORIO DE REFERENCIA DE HIXIENE ANALÍTICA

A Unidade de Hixiene Analítica situada no centro do ISSGA de Pontevedra constitúese como laboratorio de referencia de hixiene analítica e desenvolverá as súas funcións baixo a dependencia da Subdirección Xeral Técnica e de Planificación.

UNIDADE DE FORMACIÓN, DIVULGACIÓN E DOCUMENTACIÓN

A Xefatura de Sección de Formación do centro do ISSGA en Ourense constitúese como a unidade de formación, divulgación e documentación xeral do ISSGA e desenvolverá as súas funcións baixo a dependencia da Subdirección Xeral Técnica e de Planificación.

COMISIÓN PARA A INTEGRACIÓN DA IGUALDADE

O Instituto conta cunha comisión permanente de carácter asesor nos aspectos relacionados coa integración da igualdade nas políticas de prevención de riscos, correspóndelle á Subdirección Xeral Técnica e de Planificación a coordinación e xestión da dita comisión.

A Comisión estará presidida pola Xerencia, quen poderá delegar en persoal do ISSGA, en función dos proxectos que se van a tratar en cada sesión, e dela poderán formar parte representantes da autoridade laboral e das unidades de igualdade dos departamentos da Xunta de Galicia.