Formación

Os conflitos forman parte da convivencia diaria entre as persoas que comparten tempo, espazo e responsabilidades nos centros de traballo. A forma na que interpretamos as situacións, comunicamos as nosas necesidades e xestionamos as emocións determina en gran medida a evolución e o impacto destes conflitos no benestar laboral. Por iso, adquirir recursos prácticos neste ámbito convértese nun elemento clave para avanzar cara a contornas profesionais máis seguras, cooperativas e saudables.

Neste último webinar do ano afondaremos, da man de profesionais de FREMAP, nos principais factores que condicionan a comunicación e a resolución de problemas interpersoais. Analizaranse exemplos reais e moi habituais no día a día das empresas, ao tempo que se presentarán ferramentas sinxelas e eficaces para afrontar situacións difíciles con maior solvencia.

O programa inclúe un percorrido polos elementos esenciais da comunicación verbal e non verbal, as barreiras máis frecuentes que dificultan o entendemento, o papel das emocións no intercambio de mensaxes e a súa influencia na percepción do conflito. Ademais, abordarase o significado do propio conflito dentro das organizacións, así como estratexias para manexalo de forma construtiva.

Un espazo destacado dedicarase aos estilos comunicativos, con especial atención á asertividade como habilidade preventiva que favorece a expresión clara, respectuosa e equilibrada das necesidades de cada persoa.

Con esta última acción formativa para o ano 2025, o ISSGA reforza a súa aposta pola prevención dos riscos psicosociais e polo fomento dunha cultura preventiva plenamente integrada no funcionamento das empresas galegas. Un peche de programación que convida a mellorar competencias, reflexionar sobre a convivencia profesional e construír relacións laborais máis sólidas e saudables.

Máis información e inscrición: https://issgaeventos.com/habilidades-comunicacionais-e-xestion-de-conflitos/