Motivación
O ISSGA ven marcando o sector primario, en particular a actividade forestal, como un sector de actuación prioritaria e preferente pola súa importancia económica e no tecido empresarial galego, tanto no eido do estudo e investigación de accidentes, no asesoramento técnico a empresas, na promoción da prevención de riscos laborais, na elaboración de documentación técnica así como da realización de diversas actividades formativas e informativas no sector.
Unha peza clave nesta actividade é a realización dos traballos de aproveitamento forestal, o que fai necesario fomentar a concienciación no sector sobre a perigosidade das tarefas asociadas a estes postos de traballo facendo un esforzo por chegar a todo o persoal traballador.
Obxectivo
O eixo principal desta iniciativa ponse na identificación de zonas perigosas á hora de planificar os traballos de aproveitamento forestal.
É fundamental a formación e información do persoal traballador sobre os riscos máis habituais asociados a estas actividades e establecendo as medidas de protección e prevención asociadas á súa execución.
Destinatarios
Este campaña vai dirixida tanto ás empresas como ao persoal traballador do sector forestal contando coa participación activa dos servizos de prevención propios, mancomunados e alleos nesta loita contra a sinistralidade laboral.
Para a súa difusión contactarase cos servizos de prevención así como coas organizacións que forman parte do grupo de traballo técnico do sector forestal do Issga e coas entidades representativas do sector para que llos fagan chegar ao empresariado e persoas traballadoras.
Documento técnico
Trátase dun documento moi gráfico e nun formato visual no que se recollen recomendacións á hora de recoñecer as zonas perigosas nas principais tarefas de aproveitamento forestal:
-
Corta polo pé manual de árbores
-
Corta polo pé mecanizado de árbores (procesadora_taladora)
-
Derramado_tronzado (con procesadora)
-
Saca de madeira
-
Carga de madeira sobre plataforma
-
Derramado_tronzado_empilado
-
Situacións especiais
-
Predios pequenos ou de configuración especial
-
Operacións nas que se require o uso de cabrestante instalado nas máquinas
-
É fundamental situarse fóra das zonas de perigo e asegurarse que non haxa persoas nas zonas perigosas xeradas por estes traballos así como respectar as recomendacións de seguridade recollidas nos manuais de instrución dos equipos de traballo e atender ao recollido na avaliación de riscos.
Cómpre tamén lembrar a importancia de planificar, coordinarse e seguir un procedemento de traballo axeitado.
Soportes
Os soportes dispoñibles son tanto en formato dixital como físico e están dispoñibles en galego e castelán.
O número de exemplares dispoñibles para a súa difusión é de de 3.000 en galego e 500 en castelán.