Novas

• O secretario xeral de Emprego e Relacións Laborais, Pablo Fernández, participou hoxe no CNTG, en Santiago, na clausura da xornada Prevención de riscos laborais na xestión de espectáculos públicos temporais

Santiago de Compostela, 14 de maio de 2025

O secretario xeral de Emprego e Relacións Laborais, Pablo Fernández, participou hoxe na clausura da xornada Prevención de riscos laborais na xestión de espectáculos públicos temporais, organizada polo Instituto Galego de Seguridade e Saúde Laboral (Issga) e na que tamén participou a xerente desta entidade, Adela Quinzá-Torroja. O encontro, celebrado no Centro de Novas Tecnoloxías de Galicia (CNTG) en Santiago de Compostela, reuniu a expertos, responsables de prevención e representantes das empresas do sector, que achegaron aos participantes a súa visión para continuar a abordaxe e os desafíos futuros na xestión de riscos laborais nos espectáculos temporais, que debido a diversidade de axentes intervintes ou a coincidencia de actividades encadeadas ao mesmo tempo queda situado como un dos ámbitos máis complexos na xestión preventiva.

Durante a xornada técnica de hoxe, abordáronse temas fundamentais para a prevención de riscos neste eido, comezando pola explicación do criterio técnico para a xestión preventiva baseado nas recomendacións elaboradas polo grupo de traballo estatal coordinado polo Instituto Nacional de Seguridade e Saúde no Traballo cos demais órganos técnicos autonómicos. Tamén se estableceron as bases para elaborar unha folla de ruta na que a normativa doutros sectores poida ser extrapolada aos espectáculos temporais, destacando accións como a realización previa de reunións entre as empresas intervintes, a creación da figura do coordinador ou a realización dun plan de montaxe que inclúa cálculos de establidade e resistencia.

Esta xornada enmárcase dentro do Plan de acción 2025 do Issga, que como órgano técnico en materia de seguridade e saúde laboral da Administración galega é referente na difusión do coñecemento en materia preventiva, concentrando e participando neste tipo de actividades formativas e informativas, non só propias, senón tamén en colaboración con outras entidades e órganos técnicos especializados.