Novas

• A directora do ISSGA, Adela Quinzá-Torroja, inaugurou hoxe unha xornada en Pontevedra na que se presentou este mapa no que participaron empresas de diferentes sectores industriais de Galicia
• O Instituto informou das conclusións ás empresas, que se complementará coa elaboración dun documento informativo, dirixido aos traballadores e ás traballadoras do sector industrial, sobre aqueles aspectos básicos que deben coñecer para o control do risco químico no seu posto de traballo
• O ISSGA buscará outras actividades profesionais noutros sectores, como por exemplo o agro, para seguir revisando os produtos que usan e como o usan para seguir a facer recomendacións

Pontevedra, 6 de xuño de 2014.- Un total de 180 empresas participaron na elaboración do Mapa de risco químico de Galicia do Instituto Galego de Seguridade e Saúde Laboral (ISSGA), que abranguían preto de 32.000 traballadores. A dita ferramenta, que ten por obxectivo mellorar a información que existe sobre a exposición laboral a axentes químicos, supuxo o rexistro de máis de 8.200 produtos e a revisión de preto de 7.800 fichas de datos de seguridade.

A directora do ISSGA, Adela Quinzá-Torroja, inaugurou hoxe unha xornada en Pontevedra na que se presentou este mapa no que participaron empresas dos sectores da industria da madeira, industria química, plásticos e artes gráficas, fabricación de produtos minerais non metálicos, industria do metal en xeral, industria naval e da automoción, limpeza industrial e de edificios e tratamento de residuos e depuración de augas.

Segundo explicou a directora, para a elaboración, obtívose nun primeiro momento información sobre os produtos químicos presentes nas empresas e o grado de coñecemento e de control destes, para despois asesoralas sobre a correcta identificación e avaliación do risco químico.

Púxose unha especial atención aos produtos que poderían ser potencialmente canceríxenos e outros produtos que se deben controlar especialmente nos lugares de traballo. Púxose tamén especial atención á revisión da información contida nas fichas de datos de seguridade, documento con información fundamental para avaliar o risco.

A análise permitiu ao ISSGA afirmar que existen certas deficiencias na identificación dos perigos, necesario e primeiro paso para unha correcta avaliación de riscos, o que apunta á necesidade de elaborar un mapa de riscos químico. Ditas conclusións remitíronse ás empresas participantes.

Elaboración dun documento informativo
A responsable do ISSGA engadiu que estas actuacións de asesoramento vanse complementar coa elaboración dun documento informativo, dirixido aos traballadores e ás traballadoras do sector industrial, sobre aqueles aspectos básicos que deben coñecer para o control do risco químico no seu posto de traballo.

Polo tanto, o ISSGA xa enviou un informe individual con deficiencias e unha proposta de recomendacións a cada unha das empresas que participaron neste estudo e, a partir de agora, farase o documento informativo para pemes e traballadores, onde se recollan os puntos fundamentais para garantir que todos coñezan nunha primeira fase a información básica. Posteriormente, o ISSGA vixiará se as empresas van cumprindo as recomendacións propostas.

Ademais, xa se está a contactar cos servizos de prevención alleos das pequenas empresas e cos servizos de prevención propios das grandes empresas, que son os que asesoran a estas firmas en prevención e hixiene industrial, para que asuman as recomendacións enviadas nos informes.

Por último, é preciso destacar que o ISSGA buscará outras actividades profesionais noutros sectores, como por exemplo o agro, para seguir revisando os produtos que usan e como os usan para seguir a facer recomendacións.