Novas

Ourense, 22 de febreiro de 2019. Os plans de actividades do Issga dos últimos anos prestan unha especial atención ás distintas actividades económicas do sector primario galego. Deste xeito o Issga leva elaborando diverso material formativo e informativo dirixido aos traballadores e traballadoras do sector primario, con distintos formatos: guías de boas prácticas, trípticos, carteis, fichas divulgativas e documentos audiovisuais, entre outros.

O sector agrario na nosa comunidade autónoma ten unha serie de características e peculiaridades propias que convén ter en conta á hora de deseñar unha correcta política preventiva neste ámbito laboral. Desempeña un papel estratéxico en Galicia polo seu peso económico e social, que nas últimas décadas sufriu unha profunda transformación, debido á profesionalización e á especialización do sector, ademais da diminución do número de explotacións e do aumento das súas dimensións.

Garantir postos de traballo seguros e saudables, exentos de risco para a reprodución tanto para o home coma para a muller, é garantir unha mellor calidade de vida e de traballo para a poboación traballadora actual e futura.

Guía de boas prácticas_Prevención de riscos laborais durante o embarazo e a lactación no sector agrario

Esta publicación que se presenta hoxe nace co obxectivo de mellorar a seguridade e a saúde laboral deste colectivo.

Malia que a prevención das alteracións da reprodución non sería completa se non se tivera tamén en conta a saúde reprodutiva do home e da muller na idade fértil, a finalidade desta guía é proporcionar unha ferramenta para mellorar as condicións de traballo exclusivamente da muller grávida, que deu a luz recentemente ou en período de lactación, para que realicen as súas tarefas de xeito seguro e saudable.

Os cambios fisiolóxicos e anatómicos que ocorren durante o embarazo, o posparto e a lactación e as posibles complicacións, poden interferir na capacidade para traballar da muller. Por outra banda, as condicións de traballo nas que desempeña a súa actividade poden repercutir na súa saúde, no curso do embarazo, no futuro neno ou nena e na lactación.

Nesta guía, ademais de analizar as perspectivas do sector, se describen as características da muller en situación de embarazo, posparto e lactación indicando una serie de boas prácticas para evitar os riscos derivados delas; tamén se expoñen os efectos sobre a saúde no embarazo e a lactación e se destacan 12 consellos útiles directamente vencellados á realización das súas tarefas habituais así como aspectos xerais que deben ter en conta.