Novas

Madrid, 23 de maio de 2024. A Sociedade Española de Seguridade e Saúde no Traballo organiza este evento que durante os días 22, 23 e 24 está tendo lugar en Madrid baixo o lema “Saúde Integral a debate. Avances nas estratexias de prevención”.

Este congreso ten como obxectivo prioritario dar resposta ás actuais demandas de información científica sobre saúde e seguridade no traballo e constituír un foro de debate, punto de encontro e referencia nacional e internacional para o intercambio de coñecemento polos profesionais dedicados á prevención laboral.

A xerente do Issga, Adela Quinzá-Torroja García, participou hoxe impartindo unha conferencia sobre as estratexias e retos de futuro na saúde e seguridade do traballo na que expuxo os obxectivos e liñas de actuación da “Estratexia de Seguridade e Saúde no Traballo en Galicia: Horizonte 2027”, un documento que permitirá adecuar a prevención de riscos ás novas formas de traballo e que incidirá, de xeito decisivo, na redución da sinistralidade nos sectores máis afectados.

A estratexia foi resultado dun proceso participativo e conta co consenso do diálogo social e as achegas de diferentes departamentos da Xunta, que se adapta aos actuais marcos estratéxicos europeo e español e dá resposta á transformación ecolóxica, social e dixital que se está a vivir.

O documento, así, ademais de supor un salto cualitativo para sentar as bases da cultura do benestar laboral na Comunidade e de asumir como principio a perspectiva de xénero, enfronta os riscos derivados dos novos escenarios laborais.