Novas

11 de febreiro  de 2025

Hoxe tivo lugar a  primeira sesión preventiva de 2025  do Grupo de Traballo de EEPP das Comunidades Autónomas-INSST baixo o tíitulo “A saúde laboral nas mulleres da pesca: mariscadoras e redeiras”. A sesión ofrecerá unha oportunidade única para profundar nas iniciativas impulsadas polo Instituto de Seguridade e Saúde Laboral de Galicia (ISSGA) para mellorar a saúde e seguridade laboral das mulleres no sector pesqueiro.

Durante esta sesión, abordaranse aspectos clave relacionados coa saúde laboral en profesións historicamente desempeñadas por mulleres, en particular as mariscadoras e redeiras, afondando nos avances logrados, nos desafíos actuais a na necesidade de seguir impulsando a saúde laboral neste sector, con especial atención ao recoñecemento das EEPP .
O relatorio estará a cargo de Nieves Lorenzo Espeso, xefa da área Técnica de Medicina do Traballo, Ergonomía e Psicosociología Aplicada do ISSGA. Nieves ofrecerá unha visión detallada das iniciativas e medidas que se están a  implementar para garantir unha contorna laboral segura e saudable neste sector. 

O reforzo da protección das persoas traballadoras consideradas especialmente sensibles e  de colectivos vulnerables  é unha das actuacións preferentes do ISSGA que contempla no Plan  de actuación 2025. Deste xeito a campaña de asesoramento técnico e colaboración con colectivos de mariscadoras e redeiras para a PRL e PST incorpora tamén iniciativas de promoción e asesoramento sobre alimentación saudable, a práctica de exercicio físico e outros aspectos que incidan no seu benestar laboral, e tendo moi en conta a perspectiva de xénero e de idade.