Martes, Outubro 19, 2010
O ISSGA participa no Congreso Internacional de Prevención de Riscos Laborais en Lugo
O ISSGA colabora coa Facultade de Ciencias do Campus Universitario de Lugo, da USC, e coa Sociedade Galega de Prevención de Riscos Laborais, na organización do Congreso Internacional de Prevención de Riscos Laborais que se celebrará os vindeiros días 20, 21 e 22 de outubro en Lugo.
A conselleira de Traballo e Benestar, Beatriz Mato, inaugurará o Congreso o vindeiro mércores día 20 co relatorio “A prevención de Riscos Laborais e a Responsabilidade Social Empresarial”.
O xoves día 21 Nieves Lorenzo Espeso, xefa do equipo técnico de Medicina Laboral do Centro do ISSGA da Coruña moderará a mesa redonda titulada “Toxicoloxía laboral” na que participarán representantes da Universidade de Barcelona, do Hospital Clínico Universitario de Zaragoza, do Instituto Navarro de Saúde Laboral e dos Laboratorios Dr. Echevarne.
O venres 22 a directora do ISSGA, Adela Quinzá-Torroja García presentará o relatorio “Xestión Integrada de Calidade, Prevención e Responsabilidade Social”, que será ofrecido por Vicente Riveira Rico, profesor titular da Universidade Politécnica de Madrid.
O programa do Congreso complétase con conferencias e mesas redonda sobre temas tan relevantes como hixiene industrial, ergonomía, riscos psicosociais, seguridade antiincendios, riscos laborais no sector agrario, asma laboral ou sistemas de xestión OHSAS 18000, entre outros.
No marco do Congreso, os días 22 e 23 de outubro impartirase o obradoiro “Como actuar co meu propio estres”. O acto de clausura será o venres 22 ás 13.30 horas a cargo da conselleira de Sanidade, Pilar Farjas.
O Congreso vai dirixido a técnicos en prevención de riscos laborais, profesionais relacionados coa saúde laboral: médicos e enfermeiros do traballo, médicos de atención primaria, médicos inspectores, empresarios e directivos interesados en actualizarse sobre temas de prevención de riscos laborais, representantes sindicais e traballadores interesados ou con responsabilidades na xestión da prevención de riscos laborais e técnicos das distintas administracións con responsabilidades en prevención de riscos laborais.