Venres, Xuño 01, 2012
O ISSGA coñece as condicións de traballo das redeiras para desenvolver unha guía da vixilancia para a saúde do sector
A directora do ISSGA, Adela Quinzá-Torroja, reuniuse coa presidenta da Federación de redeiras de O Peirao, Rosa Isabel Rodríguez Vida.
O Instituto levará a cabo un estudo epidemiolóxico deste sector, enmarcado no Plan de actividades do ISSGA para o ano 2012.
A abordaxe do estudo deste colectivo permitirá obter información sobre os factores de risco laboral implicados nos danos para a saúde que se detecten.
Corme (A Coruña), 2 de marzo de 2012.- A directora do Instituto Galego de Seguridade e Saúde Laboral (ISSGA), Adela Quinzá-Torroja, achegouse hoxe ata a sede da Asociación de redeiras de Corme (A Coruña) para coñecer a súa actividade laboral e condicións de traballo co obxectivo de desenvolver unha Guía da vixilancia para a saúde no sector.
Quinzá-Torroja reuniuse coa presidenta da Federación de redeiras de O Peirao, Rosa Isabel Rodríguez Vida, á que explicou que antes da guía, o Instituto –dependente da Consellería de Traballo e Benestar- levará a cabo un estudo epidemiolóxico deste sector, enmarcado no Plan de actividades do ISSGA para o ano 2012.
A directora do ISSGA lembrou que “debido ás condicións de vida e traballo nos buques e a que os accidentes de máis gravidade se producen entre os traballadores a bordo, é frecuente esquecer que moitas actividades do sector, anexas á pesca ou á extracción, son desenvolvidas por traballadores en terra”.
Entre elas se encontra o das redeiras, colectivo feminizado que abrangue a un número significativo de mulleres cuxa ocupación comporta non poucos riscos de carácter fundamentalmente ergonómico.
A abordaxe do estudo deste colectivo de traballadoras por conta propia permitirá coñecer datos acerca da saúde laboral nesta actividade profesional e obter información sobre os factores de risco laboral implicados nos danos para a saúde que se detecten.
Con estas iniciativas preténdese visualizar as patoloxías profesionais do sector e os riscos vencellados as mesmas e propoñer, no seu caso, medidas preventivas e de boas prácticas para reducir ditos riscos ou os seus efectos sobre a saúde dos traballadores. Afeccións osteomusculares coma son as tendinite, tensosinovite, omalxias, e o síndrome do túnel do carpo, son afeccións moi comunmente referidas polo sector .
Os resultados serán a base tamén para a elaboración da Guía da vixilancia da saúde para o sector, no marco da colaboración que o ISSGA mantén cos Institutos homólogos da costa cantábrica.