Novas

As actividades, dentro do programa “Promovendo a cultura da saúde” terán lugar os días 7 e 8 de febreiro, inclúen dous bloques temáticos, estando centrado o primeiro en experiencias e proxectos de responsabilidade social e en segundo no cancro e a actividade laboral.

Neste último bloque participan Nieves Novo, xefe do Centro Issga de Lugo e Mª Paz Eyre, xefa do servizo de Medicina Laboral do mesmo centro, que presentarán un relatorio sobre os factores de risco relacionados co traballo, que terá lugar ás 18,30 horas do venres, 7 de febreiro.

Sendo o 4 de febreiro o Día Mundial contra o Cancro hai que destacar que o cancro converteuse nas últimas décadas nun dos principais problemas de saúde da nosa contorna.

Os canceríxenos laborais ocupan un posto especial na identificación, avaliación e prevención de toda clase de canceríxenos humanos e constitúen unha proporción significativa do total de canceríxenos recoñecidos. É importante detectalos e identificalos para poder implantar medidas de protección.

Os beneficios obtidos da identificación e actuación sobre devanditos canceríxenos non se limitan soamente ao ambiente laboral, senón tamén á poboación en xeral, xa que está igualmente exposta a varias destas sustancias canceríxenas.

Na actualidade a IARC  (Axencia Internacional de Investigación sobre o Cancro) clasificou 107 axentes como definitivamente canceríxenos, 58 axentes como probablemente canceríxenos e 249 axentes como posiblemente canceríxenos para o humano (Grupos 1, 2A e 2B respectivamente) e moitos deles poden estar presentes no ámbito laboral.

Na primeira lista de enfermidades profesionais española a única referencia ao cancro profesional atopábase no recoñecemento dos epiteliomas da pel na manipulación de brea, alcatrán e outras sustancias. Algo parecido ocorreu na lista de 1947 e non sendo ata 1961 cando a nova lista cita explicitamente o carcinoma e lesións precancerosas da pel e indirectamente outros cancros, ao facer referencia, por exemplo, ás enfermidades causadas polo benceno.

Non foi ata 1978 que unha nova lista de enfermidades profesionais incluíu o carcinoma primitivo de bronquio ou pulmón por asbesto, o mesiotelioma pleural ou peritoneal debidos á mesma causa, o carcinoma por níquel, o angiosarcoma hepático por cloruro de vinilo monómero, o cancro do sistema hematopoyético debido ao benceno, e outros cancros.

A renovación de esta lista efectuada en 2006 tivo un efecto moderado no recoñecemento de cancros profesionais: mentres que no ano 2004 a Seguridade Social recoñeceu 6 casos de cancro profesional, e 12 en 2005, no ano 2008 foron 36, 37 en 2009, 20 en 2010 e 19 en 2011.

Diversos estudos cifran que en torno ao 4%-5% de todos os cancros pódense atribuír a exposicións laborais.