Novas

Hoxe visitaron o centro Issga de Pontevedra 30 alumnos que están cursando o Ciclo Superior de Laboratorio de Diagnóstico Clínico do Centro Educativo Aloya de Vigo.

A visita centrouse especialmente na área de Medicina Laboral, na que este centro dispón de instalacións autorizadas en medicina do traballo e análises clínicas para facer recoñecementos médicos segundo as actividades programadas no Plan anual de actividades do Issga, fundamentalmente a traballadores e traballadoras autónomos/as.

Estas actividades permiten o desenvolvemento de estudos epidemiolóxicos en saúde laboral para a identificación de enfermidades laborais vinculadas a riscos novos e emerxentes e analizar a súa correlación coas condicións de traballo, contribuíndo a visualizar as enfermidades profesionais.

Durante o pasado ano, o Issga realizou 645 recoñecementos médicos, 746 análises, 33.704 determinacións analíticas e 8.426 probas médicas complementarias (auditivas, respiratorias, visuais, cardíacas, radiolóxicas, etc.).

Con esta visita se persegue concienciar os estudantes de formación profesional e bacharelato da importancia da seguridade e a saúde laboral no traballo.