Novas

Mércores, 25 de abril de 2018.- Esta acción formativa sobre prevención de riscos laborais e primeiros auxilios tivo un contido teórico e práctico e foi impartida por María García Díaz, especialista en enfermería do traballo e Álvaro J. López Aenlle, xefe de equipo de Seguridade, ambos os dous técnicos de prevención do centro do ISSGA de Lugo.

Estivo destinada a uns 60 alumnos do IES Gregorio Fernandez de Sarria:

• Ciclo Medio de Xestión Administrativa

• Ciclo Superior de Administración e Finanzas

• Ciclo Medio de Mecanizado

• Ciclo Medio de Mantemento Electromecánico

• Ciclo Superior de Mecatrónica Industrial

• Formación Profesional Básica, as ramas de Administrativo e de Fabricación Mecánica

Unha das funcións máis importantes do Issga é a de colaborar coa autoridade educativa, a universidade e os centros de investigación para implantar en todos os ciclos e niveis formativos programas educativos de prevención de riscos laborais.

A introdución da cultura preventiva en etapas anteriores á incorporación das persoas á actividade laboral xera unha conciencia consolidada, e a vía máis operativa para isto é a través do sistema educativo. Así, a prevención de riscos laborais debe promoverse en todas as etapas do sistema educativo.

Por isto, o ISSGA desenvolve actividades que teñen por finalidade mellorar a información, sensibilización e formación no eido da prevención de riscos laborais na poboación escolar nos diferentes niveis educativos da educación primaria, secundaria, bacharelato e formación profesional, e o apoio técnico ao profesorado.

Así, cómpre colaborar coa consellería competente en materia de educación na realización de actuacións nos centros educativos para promover a adquisición dunha cultura preventiva no eido laboral dos mozos e das mozas da Comunidade Autónoma de Galicia, inculcándolles condutas seguras e saudables nunha liña de anticipación aos riscos laborais aos que como futuros empresarios e traballadores terán que enfrontarse.