Novas

Monforte de Lemos, 10 de xuño de 2026

Os días 8 e 10 de xuño, persoal técnico do Issga desprazouse ao Centro de Formación e Experimentación Agraria (CFEA) de Monforte de Lemos para impartir dúas xornadas técnicas dirixidas ao alumnado que está a realizar o Curso de Aptitude Empresarial Agraria

O obxectivo destas xornadas é concienciar sobre o uso seguro da maquinaria agrícola e moi especialmente  do tractor. Ao longo da xornada  técnicos do Issga explicaron os riscos e as  as principais medidas de prevención no uso do tractor e outra maquinaria agrícola e a necesidade de adoitar as precaucións necesarias no seu uso, así como como os derivados doutras actividades relevantes do sector.

A campaña parte da idea de sensibilizar desde a base ao alumnado de formación profesional e aos futuros profesionais das explotacións, sobre a necesidade de facer un uso seguro desta maquinaria e provela de estruturas de protección e cintos de seguridade.

Segundo datos do Observatorio Estatal de Condicións de Traballo (OECT) do Instituto Nacional de Seguridade e Saúde no Traballo (INSST) o principal axente material asociado aos accidentes en xornada laboral na actividade agrícola e gandeira é o tractor. O envorco é unha das causas que poden desembocar nas consecuencias máis graves e mesmo mortais se non se toman as medidas apropiadas de seguridade. Os accidentes de maior gravidade débense principalmente a ausencia de estrutura de protección e de cinto de seguridade. Tamén a unha nula ou mala utilización destes sistemas dos que veñen provistos os tractores.

Con iniciativas como esta, o Issga reforza o seu compromiso de fomentar a cultura preventiva coa sensibilización e a formación das novas xeracións de traballadores e traballadoras, promovendo a integración da seguridade e saúde no traballo como un valor esencial para o desenvolvemento dunha actividade profesional segura e saudable.