Novas

Santiago, 30 de xuño de 2014.- Galicia rexistrou un total de 9.466 accidentes laborais nos cinco primeiros meses do ano, fronte aos 9.223 no mesmo período do ano 2013, isto supón un incremento do 2,63% neste período.

Agás en Pontevedra, este aumento dos accidentes laborais deuse en todas as provincias. Aumentaron os accidentes na Coruña, nunha porcentaxe do 4,89%; en Lugo, nun 1,36%; e en Ourense, nun 5,57%. Os accidentes diminuíron en Pontevedra nun 0,95%.

Pola súa banda, o total dos accidentes laborais en xornada laboral rexistrados en Galicia en maio aumentou un 14,55%. Neste mes rexistráronse 1.992 accidentes fronte aos 1.739 rexistrados no mesmo mes do ano anterior. Do total dos accidentes, 1.949 foron leves, 34 graves e 9 mortais. Aumentaron en todos os sectores: na construción, nun 31,47%; na industria, nun 22,77%; na agricultura, nun 13,95%; nos servizos, nun 6,88%; e na pesca, nun 5,38%.

Para ter unha visión precisa da evolución da sinistralidade laboral, utilízase o índice de incidencia, que compara o número de accidentes co número de traballadores coas continxencias profesionais cubertas.

O índice de incidencia do total dos accidentes en xornada laboral en Galicia, aumentou un 14,07% en maio deste ano respecto ao mesmo mes do ano anterior. Por sectores, o maior aumento foi na construción co 32,47%, na industria nun 25,76%, na agricultura nun 16,15%, na pesca foi do 7,90% e nos servizos do 5,37%.