Novas

Os directores xerais dos institutos de seguridade e saúde laborais de Galicia, Asturias, Cantabria e Euskadi reuniranse mañá en San Sebastián para avanzar no desenvolvemento conxunto de medidas preventivas que permitan reducir a sinestralidade no sector pesqueiro.

Tras o encontro celebrado o pasado mes de novembro en Santiago de Compostela, a reunión de mañá, organizada polo Instituto vasco de Seguridade e Saúde Laborais - Osalan -, servirá para afondar nos contidos dunha futura "Guía para a vixilancia da seguridade e a saúde no sector pesqueiro". Segundo informou hoxe nunha nota o Departamento vasco de Emprego e Asuntos Sociais, a elaboración deste manual forma parte do paquete de medidas recollidas no Plan de Osalan para a prevención de riscos laborais no sector pesqueiro de Euskadi.

Segundo datos da Enquisa de poboación activa (EPA), máis da metade das persoas ocupadas en tarefas relacionadas coa pesca supera as 50 horas semanais de traballo.
Entre os riscos relacionados coa seguridade, os máis destacados son as posibles caídas ao mar ao embarcar e desembarcar ou no desenvolvemento da actividade, durante as manobras de largado e virado da rede, ou ao subir as capturas ao barco, recordou o Goberno Vasco.

Tamén se producen accidentes como consecuencia de caídas ao mesmo nivel pola presenza de restos de peixe, obxectos e líquidos derramados nas diferentes operacións e manobras do buque, todo iso coa agravante do balanceo do barco ou unha iluminación deficiente.

No encontro de mañá tamén se abordarán aspectos relativos á formación dos traballadores do mar en materia de prevención de riscos xa que, segundo datos facilitados polo Goberno Vasco, o 77 por cento dos riscos identificados durante as manobras de pesca están asociados á escasa información e formación do persoal.