Novas

A Escola de Prevención de Riscos Laborais do ISSGA celebrou esta mañá na súa sede en Santiago de Compostela o acto de entrega de premios da cuarta edición do concurso educativo “Crea o teu conto”, no que participaron alumnos de educación primaria de distintos centros educativos de Galicia. O obxectivo do certame, no que se presentaron un total de 56 contos, é fomentar a prevención dos riscos entre o alumnado galego de xeito participativo.

Austin Gueroguiev Lapido, alumno de 4º de Primaria do Colexio La Milagrosa de Santiago de Compostela resultou o gañador do certame, premiado cun ordenador portátil. Déborah de Araujo Pacheco, alumna de 3º do CEIP Ramón Cabanillas de Santiago levou o segundo premio, consistente nunha cámara de fotos dixital e Candela San Juan Vázquez, alumna tamén de 3º deste último centro educativo foi a terceira gañadora, á quen se lle fixo entrega dun MP3. Ademais dos galardóns, os tres traballos gañadores serán publicados na revista de prevención de riscos laborais da Escola. Todos os participantes recibiron ademais un pendrive da Escola de Prevención do ISSGA.

Ao acto asistiron os alumnos de 3º e 4º do Colexio La Milagrosa e do CEIP Ramón Cabanillas, que realizaron unha visita polas instalacións da Escola e recibiron unha mochila, un estoxo, un cómic e un pasatempo da Escola de Prevención.