Luns, Novembro 12, 2018
Analizamos en Pontevedra as actuacións das pemes en PRL nos procesos de internacionalización
Rande-Redondela, 12 de novembro de 2018. As empresas inmersas en procesos de internacionalización enfróntanse a grandes dificultades á hora de xestionar a prevención de riscos laborais dos seus traballadores con importantes retos aos que se teñen que enfrontar os profesionais da prevención.
O obxecto desta xornada técnica adicada ás pemes non foi outro que o de informar e sensibilizar ao mundo empresarial da importancia da prevención de riscos laborais, proporcionando directrices e ferramentas para unha xestión eficaz.
A internacionalización das pemes marca novos retos en materia de seguridade e saúde dos seus traballadores. Nestes procesos de globalización hai que prestar especial atención á, cada vez maior, mobilidade dos traballadores e ás esixencias de prevención de riscos laborais que diso se derivan.
Ao longo da xornada analizouse a problemática que xurde antes, durante e despois do desprazamento empresarial e dos requisitos esixibles en cada momento.
Así mesmo, abordáronse as dificultades que se poden dar para garantir a seguridade e saúde dos traballadores, asegurando o cumprimento normativo das diferentes lexislacións.
Finalmente, tivemos a oportunidade de coñecer e valorar a experiencia empresarial galega en materia de prevención de riscos laborais nas obras de alta velocidade Meca-Medina, tendo en conta dos problemas concretos que houbo que afrontar pola situación xeográfica, a climatoloxía e o cambio cultural e relixioso.
É importante, polo tanto, proporcionar ás pemes e aos profesionais da prevención o apoio, as directrices e as ferramentas necesarias para a xestión preventiva da súa empresa e, en particular, dos riscos derivados dos procesos de internacionalización, co fin de garantir a seguridade e a saúde dos seus traballadores desprazados.