Novas

No centro ISSGA da Coruña tivo lugar, dentro da programación formativa do Issga para 2013, unha xornada técnica na que se informou ás empresas e traballadores sobre as medidas idóneas que se teñen que poñer en práctica na prevención de riscos laborais cando se realizan  traballos en recintos ou espazos confinados, os cales teñen a consideración de traballos con risco especial.

 

Os lugares que son catalogados como confinados son aqueles que  presentan aberturas limitadas para a entrada e a saída ademais dunha ventilación natural desfavorable, nos que existe por tanto a posibilidade de que se acumulen contaminantes tóxicos e inflamables ou pode ter unha atmosfera deficiente en osíxeno; trátase de espazos que non están concibidos para unha ocupación continua por parte dos traballadores.

 

Belkys Torres,  técnica do ISSGA, fixo unha introdución á temática da xornada mostrando a definición e a clasificación destes espazos confinados. Deseguido, Iván Ruíz, falou dos diferentes tipos de sistemas de detección de gases existentes no mercado, como seleccionar o adecuado atendendo aos tipos de instalacións nos que se realicen os traballos e as comprobacións e axustes que se lles teñen que facer a estes equipos. Para rematar, Marcos Moure explicou como se fai a medición da atmosfera, cales poden ser as técnicas adecuadas de acceso e rescate en espazos confinados e resaltou a importancia da formación e o adestramento dos traballadores que vaian a acceder a un espazo confinado.