Xoves, Febreiro 23, 2023
Presentación da Estratexia Española de Seguridade e Saúde no Traballo 2023-2027
- A saúde mental figura por primeira vez entre as prioridades da Estratexia
- Poñerase en marcha unha Axenda Nacional para a Prevención do Cancro de Orixe Profesional
- Impúlsase a perspectiva de xénero para atender de forma máis certeira á saúde e a prevención de riscos laborais
- Mellorarase a protección de colectivos vulnerables que conten con maiores taxas de sinistralidade
- Abrirase unha nova mesa de diálogo social para actualizar o marco normativo da PRL, entre outros
Madrid, 23/02/2023. A vicepresidenta segunda e ministra de Traballo e Economía Social, Yolanda Díaz Pérez, presentou o acordo alcanzado con Diálogo Social para a Estratexia Española de Seguridade e Saúde no Traballo 2023-2027, un consenso que contou coa participación dos principais interlocutores sociais e representantes das Comunidades Autónomas, na que Galicia, xunto con Cantabria, encargáronse de ser portavoces e coordinadoras do resto das Comunidades Autónomas.
Co obxectivo de conseguir a maior eficacia posible na mellora das condicións de seguridade e saúde no traballo e tentar anticiparse e xestionar as posibles ameazas e riscos para a saúde das persoas traballadoras que emerxen co cambiante mundo laboral, a Estratexia foi elaborada ao redor de seis obxectivos estratéxicos:
- Mellorar a prevención de accidentes de traballo e enfermidades profesionais.
- Xestionar os cambios derivados das novas formas de organización do traballo, a evolución demográfica e o cambio climático.
- Mellorar a xestión da seguridade e a saúde nas pemes, unha aposta pola integración e a formación en prevención de riscos laborais.
- Reforzar a protección das persoas traballadoras en situación de maior vulnerabilidade.
- Introducir a perspectiva de xénero no ámbito da seguridade e saúde no traballo.
- Fortalecer o sistema nacional de seguridade e saúde no traballo para afrontar con éxito futuras crise.