Novas

No mes de setembro deste ano, producíronse en Galicia 109 comunicacións de enfermidades profesionais a través do sistema CEPROSS da Seguridade Social. Do total de patoloxías que foron notificadas, 84 foron con baixa, afectando a 45 homes e a 39 mulleres, mentres que as restantes 25 (14 homes e 11 mulleres) non requiriron baixa laboral.

Facendo unha clasificación por sectores de actividade, os que rexistraron o maior número de enfermos con baixa o pasado mes de setembro foron a industria e a construción, con 48 e 13, respectivamente. Estas doenzas corresponden, na meirande parte, ao grupo II de enfermidades profesionais, as ocasionadas por axentes físicos (enmárcanse neste apartado as doenzas provocadas por posturas forzadas e movementos repetitivos no traballo e outras como a hipoacusia ou xordeira producida polo ruído, así como a aparición de nódulos nas cordas vocais).

Pontevedra foi a provincia na que se notificaron en setembro máis partes de enfermidades profesionais con e sen baixa, un total de 48, das que 21 corresponden á industria, 19 ao sector servizos, 7 á construción e 1 á pesca. En segundo lugar situouse A Coruña, onde se rexistraron 41, das que 22 foron ao sector servizos, 12 á industria, 6 á construción e 1 á agricultura.

Polo demais, en Lugo producíronse 4 declaracións de patoloxías laborais, todas elas no sector servizos, mentres que na provincia de Ourense notificáronse 16 partes de enfermidades, unha delas nos servizos e as 15 restantes na industria.

Datos acumulados

De xaneiro a setembro de 2009, contabilizáronse 926 partes de patoloxías laborais. Facendo a distribución por sexo e situación, houbo 347 homes e 318 mulleres con baixa e 164 homes e 97 mulleres sen baixa.

No acumulado do ano, os sectores da industria e os servizos foron os que rexistraron o maior número de casos de enfermidades profesionais, con baixa e sen ela. Do total de partes de patoloxías con baixa, o Grupo II (axentes físicos) supuxo máis do 75% dos casos.

Os partes de enfermidade con baixa foron moi parellos en número entre homes e mulleres, non así nos sen baixa. Facendo a consideración por sectores, é nos servizos onde se produce a maior sinistralidade para as mulleres, mentres que para os homes é o da industria, en termos absolutos. Para valorar estes datos no contexto, hai que ter en conta o número de traballadores e traballadoras nos correspondentes sectores de actividade, obtendo así a incidencia das enfermidades nos mesmos. A maior incidencia das enfermidades profesionais aconteceu na industria, tendo especial significación nas mulleres nos casos con baixa, e nos homes os partes sen baixa.