Este documento comeza indicando os riscos para os traballadores que desenvolven a súa actividade nunha peixaría e que poden ser orixe de dano para a súa saúde. A continuación se establecen as medidas preventivas asociada ás distintas tarefas que realizan:
- Lugar de traballo
- Preparación do produto. Ferramentas manuais
- Lavado e evisceración do peixe
- Conxelación e acondicionamento do peixe
Así mesmo, tamén se fai referencia ás medidas sanitarias para a manipulación de alimentos, aos equipos de protección individual, á formación e ás enfermidades profesionais.
Ao final da publicación se lembran algunhas recomendacións que cómpre ter en conta, entre as que destacamos as seguintes:
- Cando os traballadores/as da peixaría sufran picadas ou cortes causados polas espiñas do peixe deberán tratalos de forma inmediata, xa que poden producir feridas dolorosas e difíciles de curar.
- Á hora de manipular o peixe fresco e os bloques de peixe conxelado, tamén deberá utilizar luvas de seguridade para evitar picadas nas mans debido ás espiñas ou bordos cortantes.
- Á hora de amorear as caixas e bandexas de peixe, o traballador/a farao tendo en conta a súa correcta colocación de forma que o peso estea convenientemente repartido.
- Os traballadores/as, á hora de acceder ao interior da cámara frigorífica deberán dispoñer de pezas de abrigo adecuadas como cubrecabezas, calzado e luvas illantes e calquera tipo de protección necesaria para realizar os devanditos labores con total seguridade.
- Antes de usar unha máquina ou calquera utensilio de corte é de vital importancia coñecer o seu funcionamento e sistemas de seguridade e protección.
- Os traballadores/as deben evitar realizar movementos repetitivos e se os fan deben introducir pausas frecuentes ou alternancia de tarefas.
- Sobre a manipulación manual de cargas deberán efectualas con axuda mecánica, auxiliar ou ben pedindo axuda a un compañeiro.
A súa autora é María García Díaz, técnica superior de Prevención de Riscos Laborais e Enfermeira especialista en Enfermaría do Traballo do ISSGA.
- Documentación
