Noticias

Na páxina web da Consellería de Traballo e Benestar vén de publicarse como disposición en elaboración o proxecto de Orde pola que se establecen os prezos privados pola realización de determinacións analíticas no laboratorio de referencia de hixiene analítica do Instituto Galego de Seguridade e Saúde Laboral.

O ISSGA, a través da unidade de hixiene analítica situada no centro do ISSGA en Pontevedra, que se constitúe como laboratorio de referencia de hixiene analítica, vén realizando determinacións analíticas de mostras ambientais e biolóxicas para atender as necesidades propias do instituto; pero, consciente da existencia na Comunidade Autónoma dunha demanda destes servizos dentro do sector privado, fíxase como obxectivo no seu Plan de actividades para o ano 2011 estender a prestación dos servizos do laboratorio de hixiene analítica aos usuarios que o soliciten, xa sexan servizos de prevención alleos, propios ou mancomunados ou empresas privadas que voluntariamente o requiran.

Trátase por unha banda, de atender á demanda de análises proveniente principalmente de servizos de prevención, e por outra, de acadar un maior rendemento dos medios materiais e persoais cos que conta o instituto, ao tempo que constituirá unha fonte adicional de ingresos para o instituto, que permitirá financiar outras actuacións orientadas á protección da seguridade e saúde dos traballadores.

O texto do proxecto da Orde pola que se establecen os prezos privados pola realización de determinacións analíticas no laboratorio de referencia de hixiene analítica do Instituto Galego de Seguridade e Saúde Laboral pódese consultar na ligazón que se indica a continuación.