Estímase que unha terceira parte da poboación laboral son profesionais da voz, é dicir, persoas que utilizan a voz como principal ferramenta de traballo, sen a cal non poderían desenvolver as súas tarefas con normalidade.
É necesario facilitarlles aos profesionais da voz o acceso a unha formación preventiva teórico-práctica relacionada cos riscos derivados do uso continuado e sostido da voz que poden intervir na aparición das enfermidades profesionais, e como previlas.
Os obxectivos desta formación son:
- Comprender a voz e o seu complexo funcionamento, introducindo unhas nocións de anatomía e fisioloxía.
- Enumerar e describir os diferentes trastornos da voz.
- Identificar aquelas actividades laborais nas que se realizan esforzos sostidos da voz por motivos profesionais.
- Coñecer cales son os factores de risco intrínsecos e extrínsecos para a voz e como controlalos.
- Adquirir técnicas para mellorar o uso da voz: prácticas específicas sobre xesto corporal, xesto vocal e exercicios de quecemento vocal.
- Aplicar ao posto de traballo os coñecementos adquiridos sobre o correcto uso da voz.
- Facilitar a detección e intervención terapéutica precoz das patoloxías profesionais relacionadas coa exposición laboral da voz.
- Destacar a importancia da vixilancia da saúde para a detección e intervención precoz das patoloxías profesionais da voz e para a implantación de medidas preventivas.
- Recoñecer os signos de alerta ante unha posible patoloxía da voz de orixe laboral.
- Coñecer os circuítos de atención sanitaria para as disfonías profesionais.
- Entender os conceptos básicos de rehabilitación vocal.